مصر نے اپنی فیس بک متعارف کروادی facebook Egypt Face

کائرہ: مصر نے سماجی رابطے کی ویب سائٹ فیس بک کے مقابلے میں ’اجپٹ فیس‘ کے نام سے سوشل ویب سائٹ متعارف کروادی۔

غیر ملکی خبر رساں ادارے کے مطابق مصر کے وزیر اطلاعات نے گزشتہ ماہ اعلان کیا تھا کہ مصر خود اپنی سماجی رابطے کی ویب سائٹ بنانے کا ارادہ رکھتا ہے جبکہ اب مصر نے اپنی فیس بک متعارف کرادی ہے جسے ’اجپٹ فیس‘ کا نام دیا گیا ہے۔

مصر کی جانب سے بنائی جانے والی فیس بک کے فرنٹ پیج پر لیور پول کلب کے لیے کھیلنے والے نامور فٹبالر محمد صالح کی تصویر کو کور فوٹو کے طور پر لگایا گیا ہے، ویب سائٹ کی تھیم بھی فیس بک کی طرح نیلے رنگ کی رکھی گئی ہے۔

ابتدائی طور پر مصری فیس بک کو استعمال کرنے کے لیے تین زبانوں کا انتخاب کیا جاسکتا ہے جن میں انگریزی، فرانسیسی اور عربی شامل ہیں جبکہ نیا اکاؤنٹ بنانے کے لیے ویب سائٹ کا طریقہ کار تقریباً فیس بک جیسا ہی رکھا گیا ہے۔

رپورٹس کے مطابق اب تک 500 سے زائد افراد اس فیس بک کو سبکسرائب کرچکے ہیں، مصر کے وزیر اطلاعات یاسر القادی کا کہنا ہے کہ انتہا پسندی کے خلاف جنگ میں ہماری پالیسی بہت واضح ہے جبکہ مستقبل قریب میں اسی طرح سماجی رابطے کی مزید ویب سائٹس بھی بنائی جائیں گی۔

انہوں نے مزید کہا کہ ہمیں شہریوں کے ڈیٹا کے حفاظت کے قابل ہونا چاہئے اور ملک میں استحکام کے لیے اپنے شہریوں کی مدد کرنی چاہئے۔


Print Friendly, PDF & Email

Source link

اپنا تبصرہ بھیجیں